Не се остварија црните сценарија на опозицијата, Македонија доби нова препорака за почеток на преговорите за членство во Европската унија, вели Илија Димовски од владејачката ВМРО-ДПМНЕ. Оваа партија ја поздравува шестата по ред препорака на Европската комисија за земјава. „Оваа препорака значи дека Европската комисија отценува дека Република Македонија ги исполнува демократските и институционалните услови за наше целосно интегрирање во Унијата. Македонија е држава која е спремна да започне преговори. Македонија ги исполнува стандардите, Комисијата го констатира тоа и го препорачува. За среќа, не се остварија сценаријата за кои хаотичното раководство на СДСМ се надеваше и работеше“, вели Димовски. Според него, начинот и методологијата како е изработен и презентиран Извештајот како документ не е различен од претходните години - има елементи кои се пофалени и означени како навистина напредни, но има и теми за кои Европската комисија очекува поголем ангажман од страна на домашните институции, но и на сите политички субјекти и општествени чинители. „Жалиме што токму политичкиот дијалог помеѓу партиите и односите помеѓу нив е една од најкритикуваните теми. СДСМ со своите уцени и деструктивно однесување ги лаже сопствените членови и токму тоа е тоа на што СДСМ се осврнува. Се надеваме дека СДСМ и нивното раководство ќе научат дека со напад спрема својата држава не можат да успеат во својата желба за враќање на власт“, вели Димовски.