Премиерот Никола Груевски и оваа Влада на ВМРО ДПМНЕ ги направија катастрофалните промашувања во предвидувањата за економскиот раст на македонската економија – истакна денеска на прес-конференција потпретседателот на СДСМ Зоран Јовановски. - Во 2009 година, премиерот Груевски предвиде раст на македонската економија од 5,5 %. Се случи катастрофално промашување, наместо со раст, годината заврши со пад на економијата од 0,9 %. Во 2012 година, се повтори сликата. Премиерот Груевски предвиде раст на македонската економија од 4,5 %, а не само што немаше било каков раст, туку годината заврши со пад од 0,3 % – рече Јовановски. Јовановски смета дека промашувањата се прават намерно. - Промашените предвидувања се смислени лажни ветувања на ВМРО-ДПМНЕ, кога нема никакви резултати вештачки да се создава нереален оптимизам дека работите ќе одат на поарно. И секогаш ги слушаме истите муабети од власта. Ако не сега, работите ќе станеле подобри во втората половина на годината. Ако не годинава, тогаш наредната година. И така во круг, до бескрај – истакна Јовановски. Тој рече дека лажните очекувања што ВМРО-ДПМНЕ со години ги создава, имаат висока цена којашто ја плаќаат граѓаните. - Којзнае колку мали фирми и граѓани минатата година влегле во некаква инвестиција и зеле кредит од банка затоа што му поверувале на премиерот Груевски дека македонската економија ќе се раздвижи и ќе има висок раст. Бидејќи ветувањата на власта не се остварија и се покажаа како лажни, сите тие мали фирми и граѓани сега се заглавени до гуша во кредитите и не можат да ги вратат. Затоа од ден на ден е сé поголем бројот на граѓани кои се разочарани и повеќе не ѝ веруваат на оваа власт – истакна Јовановски. ВМРО ДПМНЕ: Само СДСМ не ја гледа европската криза Македонија е земја која добива позитивни оценки од странски реномирани фактори за своите економски политики, а Зоран Јовановски знае дека резултатот на македонската економија е резултата на глобални економски текови од што последици трпи и нашата земја, наведува ВМРО-ДПМНЕ во реакција на прес-конференцијата на потпретседателот на СДСМ Зоран Јовановски. Според ВМРО-ДПМНЕ единствено Зоран Јовановски и СДСМ не ја признаваат економската криза која ја има зафатено Европа и Светот. - Доколку е доблесен ќе признае дека СДСМ постигнуваше многу полоши економски резултати во споредба со останатите држави во време на  економски напредок во Европа и Светот кога сите останати земји бележеа  високи стапки на раст, стои во реакцијата.