Во Прилеп денеска ќе биде погребана младата Дениса Маркоска, која мистериозно загина додека работеше на брод во Егејското Море. Од Институтот за судска медицина во Скопје семејството вчера ја доби и официјалната потврда дека телото пронајдено во близина на грчкиот остров Карпатос е на Дениса. Сепак, досегашната истрага и во Грција и од македонска страна не дава повеќе детали за околностите во кои починала младата девојка. Таа последен пат била видена на палубата на бродот каде што пушела цигара и кажала дека ќе оди да спие. Нејзиното исчезнување било откриено неколку часа подоцна, а инцидентот бил пријавен во полиција дури откако бродот застанал во следното пристаниште. Маркоска подолго време работела на бродот „Серенисима“, а неодамна добила ново продолжување на договорот. По неа се трагаше неколку недели. Во потрагата беше вклучен и Интерпол, а грчките власти открија едно безживотно тело за кое со ДНК анализа утврдија дека и припаѓа на Дениса. Според неофицијални информации, во Институтот за судска медицина ќе продолжи анализата на примероците земени од телото на Дениса кои треба да откријат како починала младата девојка.