По неколку одложувања денеска на обвинителната клупа повторно ќе седнат двајцата членови на партијата Левица.

Здравко Савески и Владимир Куновски повеќе од месец дена се наоѓаат во домашен притвор а се обвинети за демолирање на канцеларијата на претседателот на државата, Ѓорѓе Иванов .

Претходните рочишта беа одложувани поради недобиеното вештачење на одбраната со што  не можеа да ја подготват листата со докази.

Во однос на целиот судски процес, Савески во неодамнешно интервју за нашиот портал изјави дека намерно се одолговлекува почетокот на судскиот процес.

„Се работи за судски процес по скратена постапка. Каква е таа скратена постапка која не може да започне по повеќе од месец и половина? Целта на одолговлекувањето е да не’ оневозможи да протестираме и кога веќе не можат да докажат дека сме учествувале во толпа што врши кривично дело, барем куќниот притвор да ни биде казна. Ние се надеваме на фер судење. Се’ помалку од тоа ќе го разобличи режимот и многу експлицитно ќе се покаже на виделина неговата репресивна природа“, рече Савески.

Од Левица партијата во која членуваат двајцата обвинети покренаа петиција за укинување на притворот на Савески и Куновски.

Со петицијата бараат да се укине мерката куќен притвор на нивните членови Здравко Савески и Владимир Куновски; да престанат на притисоците врз протестирачите;и да престане употребата на притворот како мерка за казнување.

Куновски и Савески се во домашен притвор од 25 април.