Колапс на јавниот сектор не очекува од утре доколку денеска Владата не прифати линеарно зголемување на платите на административците за 2.806 денари и потпишување Колективен договор со кој и тие од наредната година ќе добиваат К-15.

Владата во предлог за годишниот буџет не вклучила одредби за зголемување на платите за вработените во јавниот сектор, а тоа според ССМ е прекршување на Законот за минимална плата од февруари 2022 година.

Сојузот на синдикатите на Македонија ги прави последните подготовки за штрајкот што ќе се реализира на работните места. Засега се знае дека секој ден на по два часа вработените ќе излегуваат пред институциите за да и покажат на јавноста дека се во штрајк, но од ССМ информираат дека постојано заседаваат и договараат и други облици на изразување на незадоволството. 

Засега нема никаква најава од Владата дека би можеле да се состанат со ова здружение. За штрајк се подготвуваат вработените во управата, правосудството, здравството, полицијата, комуналните претпријатија и други сектори.

Во овие сектори ќе работат само по 10 проценти од вработените, а ќе се извршуваат само итните работи и активностите кои не смеат да сопрат за да не се загрози здравјето, животот и личната сигурност на вработените или граѓаните.

Поддршка на штрајкот вчера дадоа генералните секретари на Меѓународната конфедерација на синдикати, Шаран Бароу и на Европската конфедерација на синдикати, Лука Висентини.