Турскиот премиер Ахмет Давутоглу изјавил дека Турција има право да одговори, ако нејзиниот воздушен простор е прекршен покрај дадените предупредувања, пренесоа агенциите.

Давутоглу го изјавил тоа, откако руски воен авион беше урнат од турски борбени авиони на турско-сириската граница денес.

Во говорот во главниот град Анкара премиерот нагласил дека светот треба да знае дека Турција би направила „сè што е потребно“, за да ја обезбеди својата безбедност. „Турција има право да си ги брани границите. Нека светот знае дека секој кој ја нарушува нашата граница, ќе добие одговор од наша страна. Наше право е да преземаме мерки“, изјавил Давутоглу во врска со инцидентот, пренесоа агенциите.

„Нашата почитувана нација треба да знае дека ние нема да се поколебаме ниту за миг да ги превземеме потребните мерки“, изјавил Давутоглу, цитиран од агенциите. „ТАСС“ забележува дека рускиот авион „Су-24“ паднал во Сирија денес.

Рускиот претседател Владимир Путин изјавил дека авионот бил соборен од ракета воздух-воздух, истрелана од турски борбен авион Ф-16. Според зборовите на рускиот претседател во моментот на нападот рускиот „Су-24“ се наоѓал на висина од 6 000 метри и бил на 1 км од турската граница.

Путин го нарекол она што се случи како „удар во грбот“, нанесен на Русија од „соучесниците на терористите“.

Претседателот на Руската Федерација истакнал дека соборениот „Су-24“ не ја загрозувал Турција во никој случај, бидејќи спроведувал операција против забранетата терористичка организација „Исламска држава“  во Русија .

Генералштабот на Турција од своја страна тврди дека авионот го нарушил воздушниот простор на Турција и во рамките на правилата два авиони „Ф-16“ на Турција имаа отпор на предметниот авион.

Путин изјавил дека нападот на турските воздухопловни сили против рускиот „Су-24“ во Сирија ќе има сериозни последици за односите помеѓу Русија и Турција.