Претседателот Ѓорге Иванов на денешната средба со претседателот на ад хок Комисијата за настаните од 24 декември, професорот Борче Давитковски, го поздрави потпишувањето на извештајот на Комисијата и изрази очекување дека препораките од Извештајот ќе бидат доследно спроведени, информираат од кабинетот на шефот на државата. „Врз основа на информациите добиени од претседателот на ад-хок комисијата, претседателот Иванов изрази жалење за изгубеното време и начинот на кој се постигна договор околу конечниот извештај. Од друга страна, претседателот Иванов го поздрави државничкото однесување, покажаната зрелост, разумност и направените отстапки, со цел да се заштитат државните интереси и интересите на граѓаните, кои секојпат знаат да препознаат кој работи во нивни интерес“ - се наведува во соопштението од кабинетот на Иванов. Македонскиот претседател, меѓудругото, апелираше и еднаш засекогаш да се престане со деструктивни политики, политиките на ултиматуми и уцени и поставување на тесно-партиските интереси и интересите на поединци, над интересите на државата и граѓаните. Претседателот на Комисијата, Давитковски, пак, по средбата со претседателот Иванов, изјави дека е добро што побрзо да се имплементира договорот постигнат и потпишан во Комисијата. - Немам впечаток дека ВМРО-ДПМНЕ не го признава Извештајот на Комисијата, бидејќи на документот се ставени нивни потписи. Најголемиот товар од Извештајот ќе го понесе токму ВМРО-ДПМНЕ. Денеска овој документ го доставив до претседателот Ѓорге Иванов, за кого е прифатлив овој извештај и тој очекува подобра политичка клима со неговото имплементирање во парламентот - истакна Давитковски. Тој ги повика партиите разумно да одлучуваат по Извештајот кога тој ќе дојде на дневен ред во Собранието.