Европските авиокомпании се соочуваат со нови финансиски притисоци поради војната на Соединетите Американски Држави со Иран, што предизвика зголемување на цените на горивата и дополнително ги оптовари превозниците кои сè уште се опоравуваат од последиците од пандемијата, велат аналитичарите и инвеститорите.

Според нив, долготрајниот конфликт на Блискиот Исток ги зголеми оперативните трошоци и ја откри финансиската ранливост на некои европски авиокомпании, кои размислуваат за реструктуирање, продажба или дури и заштита од банкрот, објави Ројтерс.

Така, британскиот нискобуџетен превозник EasyJet се приближува кон преземање од американски инвеститори по вредност значително пониска од пред пандемијата, додека латвискиот Air Baltic бара краткорочно финансирање за да избегне неплаќање, а норвешкиот Norse Atlantic спроведува стратешки преглед на своето работење.

Барема Бокум, директор за Европа, Блискиот Исток и Африка во консултантската компанија Interpath, рече дека неговата компанија во моментов работи на реструктуирање на четири или пет големи европски авиокомпании.

Меѓународната асоцијација за воздушен транспорт (IATA) минатиот месец речиси ја преполови својата прогноза за профитот на глобалната авиоиндустрија за 2026 година, наведувајќи ги зголемените цени на горивата, прекините во воздушниот сообраќај и зголемената неизвесност предизвикана од конфликтот на Блискиот Исток.

Производителот на авиони „Ербас“ исто така ја намали својата долгорочна прогноза за побарувачката на патнички авиони, бидејќи авиокомпаниите ги одложуваат плановите за проширување на капацитетите и го планираат растот повнимателно поради геополитичките ризици и трговските тензии.

Аналитичарите предупредуваат дека помалите превозници се особено ранливи, бидејќи послабите приходи за време на летната туристичка сезона би можеле да го отежнат работењето во зима, кога авиокомпаниите традиционално бележат најниски приходи, според „Ројтерс“.