За „пактот“ против Србија, косовскиот вицепремиер, Енвер Хоџај се дообјасни. 

Тој рече дека никогаш не споменал создавање на било каков пакт против земјата. 

Како што наведе, насловот и она што го рекол во интервјуто за загребачкиот весник „Вечерњи лист“ се две сосема различни нешта.

„Никогаш не реков ништо за создавање на регионален пакт против Србија. Насловот на текстот и она што го реков се сосема различни работи“, изјави Хоџај.

Овие информациите денеска ги демантираше и премиерот Зоран Заев, кој кажа дека се оградува од било какви разговори, затоа што тие не постоеле. Тој повика Косово и Србија преку дијалог да ги решаваат проблемите. 

Претходно беше објавено дека Хоџај кажал дека во Македонија, Хрватска, Косово и Црна Гора се разговарало за пакт против Србија.

Србија ништо лошо им нема направено на Македонија, Црна Гора и Босна. 

Ова го вели српскиот вицепремиер и министер за внатрешни работи Небојша Стефановиќ. Тој реагираше синоќа по повод изјавата на косовскиот вицепремиер Енвер Хоџај дека во Хрватска, Македонија и во Црна Гора разговарал за создавање на регионален пакт против Србија.

Стефановиќ за ТВ Пинк изјави дека оваа изјава на Хоџај преставува непријателски акт против Србија и нејзините граѓани и повик за додатна дестабилизација во регионот.