Седумте клучни членки на алијансата ОПЕК+ денес би можеле да одобрат зголемување на производството на нафта за јули за 188.000 барели дневно во споредба со јуни, објавува Ројтерс, повикувајќи се на извори запознаени со дискусиите.

Според изворите, предложеното зголемување би било идентично со она што беше применето за јуни, додека е малку помалку од зголемувањата регистрирани во април и мај, делумно поради промената на производствениот статус на Обединетите Арапски Емирати во рамките на системот на квоти ОПЕК+.

„Седумте учесници најверојатно ќе донесат одлука за зголемување на квотите за 188.000 барели дневно од јули“, изјави неименуван извор, објавува Танјуг.

Конечната одлука сè уште не е официјално потврдена и се очекува по денешниот состанок. Според медиумските извештаи, не се очекуваат значајни промени во сегашната политика за производство на нафта за време на министерскиот состанок на ОПЕК+, освен евентуално зголемување на квотите за поединечни членки.