Министерот за надворешни работи на Србија, Ивица Дачиќ изјави дека Србија погрешила што ја признала Македонија под нејзиното уставно име затоа што Македонија го признала Косово и го поддржала неговото членство во УНЕСКО.

Тој додаде дека Белград во билатералните односи со Скопје и понатаму ќе го користи уставното име на Македонија, но дека мултилатерално ќе го користи името кое се употребува во ЕУ и Обединети нации – БЈРМ.

„Србија направи голема грешка. Цела Европа и целиот свет го користат називот Поранешна Југословенска Република Македонија, а ние им удривме шамар на нашите браќа Грци и сега очекуваме од Грците да не го признаат Косово, а Македонија ја признавме навредувајќи ги Грците, а тие (Македонците) секогаш гласаат за Косово. Јас морам да кажам дека сме будали“ – вели Дачиќ.

Во новогодишното интервју за агенцијата „Бета“, говорејќи за односите во регионот, Дачиќ рече дека признавањето на Косово и поддршката на неговото членство во УНЕСКО ќе ги оптовари односите на Србија со нејзините соседи – Хрватска, Црна Гора и Македонија. Кажа дека Србија ќе води политика на реципроцитет, но тоа не значи дека нешто билатерално ќе преземе против тие земји.

Тој додаде дека тоа не е одмазда, туку одговорна државна и национална политика.