Министерот за надворешни работи на соседна Србија Ивица Дачиќ вчера во Атина, после состанокот со колегата Никос Коѕиас, изјавил дека Србија и Грција се пријателски земји, кои треба меѓусебно да се поддржуваат и помагаат и разговараат за важни регионални прашања.

Шефот на српската дипломатија рекол дека е важно Србија со Грција да разговара за регионални прашања како што е влијанието на Турција во регионот, мигрантската криза, соработката во борба против тероризам, негативното влијание на големоалбанскиот фактор на Балканот, како и проблемите во „врска со името и односите со БЈРМ“.

„Сметам дека Србија направи грешка пред 20 години кога го призна Скопје под името Република Македонија. Тоа не беше коректно кон Грција, а Скопје секогаш имало негативен став по прашањето на Косово и Метохио. Тие ја признале независноста на Косово и гласале за прием на Косово во Унеско“, рекол Дачиќ.

Тој додал дека Србија нема да повлекува никакви потези кои би можеле да ја нарушат стабилноста во регионот и дека Србија „за разлика од некои други народи, нема територијални претензии кон делови од Грција“:

Дачиќ рекол дека Србите и Грците се пријатели и браќа и дека обврска на политичарите е да ја следат таа приврзаност која постои помеѓу двата народа.