Црна Гора по медиумскиот притисок да реагира на коментарите на претседателот на САД, Доналд Трамп, соопшти дека тоа е земја на мирољубиви луѓе која нема намера да влегува во конфликти.

Владата на Црна Гора соопшти дека земјата е горда на својата историја и традиција и мирна политика „која ја доведе до позицијата стабилизирачка земја во регионот и единствена држава во која не се војуваше при распадот на поранешна Југославија“. 

Ова е реакција на црногорската влада на изјавата на претседателот на САД Доналд Трамп за Фокс њуз, во која Црна Гора ја опишаа како мала држава со „многу силни и агресивни луѓе“ која би можела да започне Трета светска војна, мислејќи на конфликт со Русија.

Во оваа прилика, се огласи и американската амбасада во Подгорица, која соопшти дека „САД со гордост ја сметаат Црна Гора за сојузник“ и дека земјата продолжува да игра активна улога преку својот придонес во мисијата на НАТО во Авганистан.