Набљудувачи на невладината организација „Цивил“ откриле сериозни пропусти во евиденцијата на гласачите во избирачкиот список. На адреса „Петар Дељан“ бр. 11 во Кисела Вода се впишани избирачи кои живеат во 5-от и 6-от влез на зграда која има само два влеза. Во друга зграда, гласач бил впишан дека живее во станот број 22, а на последниот кат од таа зграда се становите со броеви 16 и 17. „Очигледно има повеќе влезови на хартија и непостоечки гласачи кои се на Избирачкиот список. Но, тие не се единствени. Ќе ја информираме Државната изборна Комисија, како и странските набљудувачи  и чекаме разврска на сево ова“, изјави претседателот на „Цивил“ Џабир Дерала. Тој најави дека набљудувачите на оваа организација ќе продолжат да ги проверуваат информациите и за други прекршувања. Нивните набљудувачи забележале изборни вработувања во Охрид и индиции за постоење на двојни лични карти на лица кои гласаат и во Скопје и во Свети Николе. Во Велес, пак, било забележано дека вработени во јавната администрација предвреме ги напуштале работните места за да присуствуваат на партиски митинг.