Грчкиот премиер, Алексис Ципрас вели дека сложено име и за надворешна и за внатрешна употреба, за кое треба уставна промена и повлекување на секакви сомнежи за иредентистички ставови, е рамката што го гарантира затворањето на проблемот. 

Како што јавува дописникот на МИА од Атина, Ципрас, на состанокот на пратеничката група на СИРИЗА, освен за економијата и скандалот Новартис, говореше и за прашањето за името. Тој вели дека грчката Влада има преземено одговорност за да се затвори проблемот „со достоинство и патриотска одговорност“ и ја повтори позицијата на Атина и барањата на грчката страна во разговорите.

„Решението не може да биде друго од едно сложено име што ќе важи за сите, за севкупна употреба. Нешто за што секако, предуслов е и уставна промена, за името навистина да биде ерга омнес, односно за севкупна употреба. Не може да биде една употреба надвор, а друго да биде името во Уставот. Секако предуслов е и повлекување на секаков сомнеж за иредентизам. Ова е единствената рамка што го гарантира решавањето на проблемот и поминување во нова ера за целиот Балкан, далеку од национализмот, фанатизмот и нетолеранцијата,“- рече Ципрас. 

Објасни дека Грција уште во времето на Југославија го прифатила терминот Македонија во името на нашата земја, а ова прифаќање продолжило со привременото име ПЈРМ, во кое, како што рече, буквата М значи Македонија.