Полицијата во Грција денеска го истражуваше убиството на 39-годишен маж во кафе-бар во прометниот дел од центарот на Атина, во близина на централната железничка станица во главниот град, кое се случи во неделата вечерта.

Човекот, кој е идентификуван само како албански државјанин, бил застрелан во главата и во стомакот од еден вооружен напаѓач, додека седел на отворено во кафе-бар на улицата Лиосион во населбата Агиос Павлос, околу 21 часот.

Очевидци, наводно, и рекле на полицијата дека човек облечен во темна облека отишол кај жртвата, го застрелал три пати, а потоа избегал возејќи брзо со автомобил со светла боја.

39-годишниот човек бил пренесен во болница со брза помош, но медицинските лица не успеале да му го спасат животот.

Полицијата го истражува инцидентот, кој можеби е поврзан со активностите на жртвата како сопственик на ноќен клуб.