Годишно стигнуваат по околу 2.500 претставки  до Државниот пазарен инспекторат(ДПИ), а граѓаните најчесто се жалат за гаранциите на производите и за лошите декларации, вели Елизабета Чингаровска, директор на Државниот пазарен инспекторат во интервју за МИА. Според неа, зголемена е свеста кај потрошувачите за нивните права и тие се почесто пишуваат претставки до надлежните институции, најчесто прво до организацијата на потрошувачи на Македонија, кои даваат совети, за потоа за конкретни мерки да се обрата до ДПИ. Покрај гарантните рокови, пред се во делот на белата техника, зачестени се жалбите за договорите за телекомуникациските услуги, како и за сметките за струја, а во наредниот период се очекува зголемување и на преставките за топлификација. Во последниве три месеци, извршени се 117 редовни контроли од аспект на безбедноста, а исто така постапено е по 166 барања од страна на Царинската управа, со што треба на сите производи што се увезуваат да им се бараат докуметни што ја потврдуваат безбедноста, појаснува Чингаровска и истакнува дека подобрена е контролата при увозот на производи односно нема увоз без сертификат за безбедност или изјава за сообразност која што кажува дека тој производ е безбеден и може да се внесе во Република Македонија. „Имаме вратено патики, фенови, брави, очила за сонце..., што беа без Ц означување. Она што е многу важно дека секој граѓанин треба да знае дека на секој производ потврда за безбедноста му е Ц ознаката која што мора да ја има. Во зависност од типот на производите треба да има  дополнителна документација, изјава и сертификат. Сертификатот за безбедност  се бара само за посложените типови производи и тоа потврдува дека тој производ ги поминал сите анализи во акредитирана лабораторија“, вели Чингаровска.

Во моментов работиме на контрола на безбедноста на детската облека, а за таа цел земен е стандардот што ја дефинира безбедноста на детската облека, комплетно преведен, направена е контролна листа која што точно кажува за која возраст како треба да биде изработена облеката за да ја гарантира безбедноста и тоа точно ова се однесува на детската облека со гајтани и врвки, бидејќи на нас ни е многу непознато колкава е опасноста доколку тие не се правилно поставени и со правилни димензии, појасни Чингаровска.

„Во моментов работиме и на контролни листи за каблите како еден сериозен да речам како производ, кој доколку не е безбеден прави голема материјална штета.  Исто така извршивме целосна контрола на безбедноста на детско помагало - дубак. При тоа утврдивме дека е тотално небезбедно и тоа веќе го повлекуваме од промет. Ние земавме примерок, го пративме на испитување во лабораторија, лабораторијата ни кажа дека се работи за небезбеден производ и тој е повлечен од пазарот“, изјави таа во интервјуто.

Во третиот квартал извршени се реализирани се вкупно 7.265 редовни контроли, 656 контролни надзори и 42 вонредни инспекциски надзори или вкупно 7.963 надзори, од кои по Законот за пушење извршени се вкупно 319 надзори.  По Законот за трговија утврдено е неправилно водење евиденција, неуредна евиденција, немање одобрение за користење на деловен простор надвор од објектот. Во делот на санкциите за прекршителите на Законот за заштита на потрошувачите, санкциите чинат од  500 евра до 3 илјади евра, а зависно од прекршокот кај дел од нив како е пропишано и затворање на објектите.