По повод празникот Рамазан Бајрам Премиерот Никола Груевски упати честитка до поглаварот на Исламската верска заедница Реис Ул Улема Хаџи Сулејман Ефенди Реџепи, до членовите на Ријасетот и до верниците од исламска вероисповед.

 „Ова се денови од неизмерно големо значење за Вашата заедница и духовна посветеност. Честитајќи Ви го празникот, Ви посакувам и сите други месеци од годината да ви бидат исполнети со вредностите и благодетите на најблагородниот и најсреќниот месец за Вас, месецот Рамазан. Вербата во Бога да нè води кон вистинскиот пат и постојано меѓу луѓето да владее слога и почитување без разлика на религиската, верската, или каква било друга определба“, се вели во честитката.

Да ги искористиме религиите и верските учења за убави нешта, додава Груевски, за продолжување на столетната традиција на пријателство, единство и хармонија, како основа за забрзан економски, културен и сеопшт развој на Република Македонија.

„Тоа е единствениот пат кој води кон подобар животот на нашите граѓани, во секој дел на државата, во секое поле и од секаков аспект. Ние силно работиме на оваа агенда и уверен сум дека заеднички ќе продолжиме да чекориме по истиот пат“, пишува во честитката

Денеска е последниот ден од месецот Рамазан во исламскиот календар, според тоа денес е последниот ден од постот кај муслиманите, кои еден месец од изгрејсонце до зајдисонце се воздржуваа од јадење, пиење, лош однос и навики, се воздржуваа од неетика и неморал, се солидаризираа со оние кои гладуваат по светот.