Цените на нафтата повторно се приближија до 100 долари за барел по новите американски напади врз Иран, бидејќи аналитичарите предупредуваат дека глобалниот енергетски пазар би можел да влезе во период на сериозна нестабилност.

Цените на суровата нафта Брент накратко го надминаа прагот од 100 долари денеска по веста дека САД таргетирале ракетни локации и бродови за кои Вашингтон рече дека се обидуваат да постават морски мини во јужен Иран.

Иако цената подоцна малку се опорави на околу 99 долари, пазарите остануваат под силен притисок од војната и блокадата на Ормутскиот теснец - еден од најважните енергетски коридори во светот.

Пазарот можеби ја поминал „точката од која нема враќање“

Аналитичарите предупредуваат дека проблемот повеќе не е само привремено зголемување на цените, туку долгорочно нарушување на глобалните залихи на нафта и гориво.

HFI Research процени дека пазарот можеби веќе ја достигнал „точката од која нема враќање“, предупредувајќи дека наредните недели би можеле да донесат „грубо будење“ за енергетскиот сектор.

Мајкл Еври, стратег во холандската Рабобанк, рече дека пазарите со месеци верувале дека дипломатскиот договор е „веднаш зад аголот“, но дека таквото сценарио постојано се одложува.

„Секој пат велат: сега има пробив, сега енергијата повторно ќе тече. Но, досега тоа не се случило“, рече Еври.

Ормутскиот теснец останува клучен проблем

Пред кризата, Ормутскиот теснец дозволуваше транспорт на околу 20 милиони барели нафта дневно. Се проценува дека сегашната блокада го намалила производството на нафта во Заливот за околу 14,4 милиони барели дневно пред војната.

Сауди Арамко предупреди дека ако затворањето на Хормуз продолжи уште неколку недели, влијанието врз глобалниот пазар би можело да трае и до следната година.

Во исто време, резервите на нафта за итни случаи што земјите ги користеа за ублажување на недостигот брзо се намалуваат.

ЏП Морган предупредува дека глобалните залихи се веќе „критично ниски“, дури и покрај падот на побарувачката предизвикан од војната и економското забавување.

Предупредување за „црвена зона“

Шефот на Меѓународната агенција за енергија, Фатих Бирол, предупреди дека светот би можел да влезе во „црвена зона“ во јули и август, период во кој глобалната потрошувачка на нафта би можела значително да го надмине производството.

Притисокот веќе се чувствува кај граѓаните.

Во Велика Британија, цените на горивата го достигнаа највисокото ниво од почетокот на конфликтот на Блискиот Исток, додека се очекува трошоците за греење и електрична енергија да се зголемат поради поскапиот гас.

Аналитичарите предупредуваат дека понатамошната ескалација меѓу САД и Иран би можела да предизвика нов бран енергетски и инфлаторни кризи низ целиот свет.