Цената на суровата нафта Brent во март забележа раст од 64 проценти, што претставува најголем месечен скок уште од Заливска војна, објави BBC.

Brent, кој се смета за глобален референтен стандард за нафта, претставува договор за купување барел нафта со испорака во иднина, а неговото поскапување директно влијае врз цените на горивата. Во средата, цената за испорака во јуни достигна околу 105,36 долари (приближно 97 евра), што е дополнителен раст од 1,2 проценти.

Претходниот ваков силен скок бил регистриран во 1990 година, за време на ирачката инвазија врз Кувајт, која го наруши глобалното снабдување со енергенси и предизвика страв од поширок конфликт на Блискиот Исток, изјави Алберто Белорин.

Аналитичарите предупредуваат дека слични услови се присутни и денес, поради конфликтот меѓу САД, Израел и Иран, што дополнително го зголемува геополитичкиот ризик и притисокот врз цените на нафтата.

• Ако нарушувањата во транспортот продолжат и конфликтот не се смири, цените би можеле дополнително да растат – предупреди Го Џинг Ронг.

Во меѓувреме, азиските берзи забележаа силен раст, откако Доналд Трамп изјави дека САД би можеле да се повлечат од конфликтот со Иран во рок од две до три недели. Јапонскиот индекс Nikkei 225 порасна за 4 проценти, додека јужнокорејскиот Kospi скокна за повеќе од 6 проценти.

Конфликтот започна кон крајот на февруари, кога американските и израелските сили извршија напади врз ирански воени и нуклеарни цели. Техеран возврати со ракетни и дронски напади врз американски бази и цели во Израел и земјите од Персискиот Залив.

Судирите се проширија и на поморскиот сообраќај, особено во Ормуски теснец, низ кој минува значителен дел од светската нафта, што дополнително ја зголемува неизвесноста на енергетските пазари.

И покрај повремените најави за можни преговори, тензиите остануваат високи, а брзо решение на кризата сè уште не е на повидок.