Уште 14 вработени во општина Центар од денеска останаа без работа, откако Владата и ја одзеде дозволата на Агенцијата за привремени вработувања преку која беа ангажирани, се пожали градоначалникот Андреј Жерновски. Невработени остануваат економисти, правници и магистри, архитекти и градежни инженери, геодети и социјални работници. “На улица остануваат оние луѓе со кои успеавме во изминатите 8 месеци долгот наследен од претходното раководство да го намалиме за 63,3 %, со кои двојно се зголеми бројот на решените предмети за легализација за разлика од претходниот период“, рече Жерновски. Претходно, од истите причини општината мораше да отпушти уште 32-ца службеници. Кабинетот, рече Жерновски, е комплетно на улица и неколку раководители на сектори не можат да си ги извршуваат дневните задачи. Според Министерството за труд и социјална политика, наводите на градоначалникот на општина Центар се неосновани и невистинити и тенденциозни. Лиценцата на агенцијата за привремени вработувања е одземена поради непочитување на законот за агенции за привремени вработувања и незаконско работење и нема апсолутно никаква друга поврзаност, велат од МТСП.