Бугарија ја зазема последната позиција по плати во приватниот сектор во ЕУ.

Бугарите добиваат едвај 4 евра за еден час работа. Во Дизелдорф денеска германскиот институт за макроекономија ги претстави резултатите од своја студија за платите во приватниот сектор во последната година.

Прва е Данска каде во приватниот сектор работодавачот плаќа во просек 43 евра за еден час. Во оваа сума е вклучено и осигурување за работникот.

Зад Данска се Белгија, Шведска и Луксембург. Германија, како и минатата година, го зазема осмото место со околу 33 евра на час. Речиси иста е цената на трудот и во приватниот сектор во соседна Австрија. Просекот за час работа за целата Европска унија е 29 евра и 50 центи.

Интересно оваа година е дека приватните фирми во Словенија, која пристапи во ЕУ во 2004 година, веќе плаќаат повеќе отколку компаниите во Грција и Португалија, кои членуваат во заедницата над три децении. Во Словенија цената на еден работен час е во просек 15 евра и 80 центи.

Бугарија, заедно со Романија се на дното. Романија е на претпоследното место со 5 евра за работен час.