Бугарија ќе им дозволи на американските воени авиони да останат на аеродромот „Васил Левски“ во Софија само до крајот на јуни, откако САД не одобриле безвизен режим за бугарските граѓани. Одлуката доаѓа по разговорите меѓу Софија и Вашингтон околу барањето бугарските државјани да патуваат во САД без визи.

Бугарскиот премиер Румен Радев изјави дека ја разбира сложеноста на американските процедури, но нагласи дека и Бугарија има свои приоритети и не може позитивно да одговори на барањето за подолг престој на американски авиони и опрема на аеродромот во Софија. Според него, продолжувањето до 30 јуни треба да им даде време на американските партнери да ги реорганизираат своите активности.

Според информациите што ги пренесе БТА, бугарската влада одобрила продолжување на распоредувањето до 15 американски авиони, придружна опрема и персонал за поддршка до крајот на следниот месец. Претходната дозвола важеше до крајот на мај.

Американските летала се распоредени на аеродромот во Софија во рамки на претходно одобрена соработка меѓу двете земји. Бугарските власти претходно соопштија дека станува збор за логистичко распоредување и за активности поврзани со заедничка воена соработка, а не за борбена мисија.

Темата предизвика дополнително внимание поради регионалните безбедносни тензии, но бугарското Министерство за одбрана претходно тврдеше дека американските авиони во Софија не се поврзани со операции против Иран. Од Софија посочуваат дека распоредувањето е дел од логистичка и воздухопловна соработка со САД.

Бугарија, која е членка на НАТО, со години бара вклучување во американската програма за безвизно патување. Радев претходно разговарал со американскиот претседател Доналд Трамп и побарал ова прашање да се разгледа итно, но според неговите изјави, досега не добил позитивен одговор.