Меморандум за соработка за спроведување на проектот „Подобрување на капацитетите за финансиски истраги“ денеска  потпишаа  британскиот амбасадор во Македонија Кристофер Ивон, претседателот на Здружението на јавните обвинители Марко Зврлевски и директорот на Управата за финансиска полиција Александар Драгачевски.

Амбасадорот Ивон истакна дека британската поддршката на Здружението на јавните обвинители почна уште во 2010 година и ќе продолжи во иднина зошто, како што нагласи, помага Македонија да се приближи кон европските интеграции. „Британија е инволвирана во делот на обезбедување на поддршка за обвинителите, судството и борбата против организираниот криминал многу години и мислам дека тоа и понатаму ќе го правиме со несмален интерес. Во вакви услови на финансиска криза какви што постојат во светот уште повеќе е битно секој скапоцен ресурс да биде заштитен, особено ако се работи за државното судство“, рече Ивон. Тој посочи дека справувањето со криминалот не е само интерес на државата, туку  и на секој поединец кој живее во неа. „Колку што повеќе финансискиот криминал станува прекуграничен толку е поважно да обезбедиме секоја алка во синџирот да биде цврсто обезбедена и заштитена. Заедничката соработка на Јавното обвинителство и Управата за финансиска полиција претставува сигнал за посветеност во насока на справувањето со заедничката закана“, рече Ивон. Проектот, како што рече претседателот на Здружението на јавни обвинители Зврлевски, е многу важен од повеќе причини меѓу кои е стручноста, односно да се направи  разлика меѓу истрага за финансиски криминал и финансиска истрага за откривање на имототната состојба на сторителите на кривичните дела. „Здружението на јавни обвинители како невладина, непартиска и доброволна организација и досега давала поддршка на сите јавни обвинители и соработници во насока на подобрување и зацврстување на нивната статусна положба, како  и овозможување нивно стручно усовршување на сите полиња. Во остварувањето на овие цели добива безрезервна поддршка од бројни владини и невладини, домашни и меѓународни институции“, рече Зврлевски. Проектот ќе го водат Управата за финансиска полиција и Здружението на јавните обвинители во Република Македонија, а ќе се спроведува во три фази. Целта на проектот е зајакнување на капацитетите на јавните обвинители во Република Македонија и Управата за финансиска полиција за ефикасно користење на финансиските истражни техники и капацитети за следење и повраток на средствата и приходите стекнати со криминал.