Европската унија денеска формално усвои закон со кој се укинуваат увозните царини за голем број американски производи, со што го исполни својот дел од трговскиот договор постигнат со администрацијата на американскиот претседател Доналд Трамп.

Со ова се избегна можноста за нов трговски конфликт меѓу двете страни на Атлантикот, објави Танјуг.

Минатата недела, Европскиот парламент го поддржа овој пакет мерки со 440 гласови „за“, 151 „против“ и 50 „воздржани“. Гласањето се одржа речиси единаесет месеци откако беше постигнат прелиминарен договор меѓу Брисел и Вашингтон за подобрување на трговските односи, објавува Ројтерс.

Дополнителен притисок врз европските влади изврши Трамп, кој предупреди дека Соединетите Американски Држави би можеле да воведат значително повисоки тарифи ако ЕУ не го спроведе договорот до 4 јули. Бидејќи законот сега е потврден од Советот на ЕУ, европската страна ќе го почитува рокот.

Според договорот, ЕУ ги укинува тарифите за голем број американски индустриски производи, а во исто време обезбедува преференцијален пристап до европскиот пазар за одредени земјоделски производи од САД. Договорот, исто така, го продолжува режимот на бесцарински увоз на американски јастог, кој првично беше договорен за време на првиот претседателски мандат на Трамп.

Усвоените правила ќе важат до крајот на 2029 година, но тие содржат и заштитни механизми. Тие ѝ дозволуваат на Европската Унија да ги суспендира трговските привилегии ако САД ги прекршат своите обврски според договорот или еднострано ги променат неговите услови.