Европските берзански индекси денеска се движат со благи падови, додека цената на нафтата продолжува да расте под влијание на геополитичките тензии. Барел нафта од типот Брент повторно се искачи над 111 долари, откако порасна за 2,98 отсто и достигна 111,45 долари, покажуваат податоците од берзите во 9:30 часот. Истовремено, цената на суровата нафта се зголеми за 2,51 отсто на 98,74 долари.

Во меѓувреме, американскиот претседател Доналд Трамп свика состанок со својот тим за национална безбедност за да го разгледа предлогот на Иран за евентуално завршување на конфликтот на Блискиот Исток.

Според информациите, Техеран сигнализирал дека е подготвен да прифати привремен договор за повторно отворање на Ормускиот теснец, под услов Вашингтон да ја укине блокадата на иранските пристаништа. Преговорите за нуклеарната програма, пак, би биле одложени за подоцна. Сепак, Иран бара да задржи одредено ниво на контрола врз транзитот низ теснецот, што најверојатно е неприфатливо за САД.

Американскиот државен секретар Марко Рубио оцени дека понудата на Иран е „подобра од очекуваното“, додека портпаролката на Белата куќа, Керолајн Ливит, изјави дека Трамп „многу брзо“ ќе донесе одлука.

На европските пазари, инвеститорите ги анализираат резултатите на големи компании како Новартис, Ербас, БП и банката Барклис. Во исто време, гасот за мај на амстердамската берза TTF се тргуваше по цена од 44,1 евро за мегават-час.

Главните европски индекси бележат мешани резултати: германскиот DAX падна за 0,35 отсто, францускиот CAC 40 за 0,12 отсто, а московскиот MOEX за 0,11 отсто. Од друга страна, британскиот FTSE 100 порасна за 0,04 отсто.

На девизниот пазар, еврото се тргува по курс од 1,16997 долари. Златото забележа пад на 4.632,55 долари за унца, додека цената на пченицата порасна на 6,26 долари за бушел.

На Волстрит, индексот Dow Jones на затворањето падна за 0,13 отсто, додека S&P 500 порасна за 0,12 отсто, а Nasdaq за 0,2 отсто.