Изборната комисија официјално ја потврди победата на босански Србин во изборите за градоначалник на Сребреница - град кој беше уништен од меѓуетничката војна во Босна и кој беше управуван без прекин од босанските муслимани од 1999 година, пренесе Франс прес.

Босанските муслимани беа загрижени за последиците од победата на Младен Грујичиќ, кој е прекорен особено за тоа дека не изјавил јавно дека масакрот на над 8.000 босански муслимански мажи и момчиња во јули 1995 година е чин на геноцид.

Меѓународниот кривичен трибунал за Југославија во Хаг осуди голем број босански Срби за злосторството. Така на пример оваа година лидерот на босанските Срби за време на војната - Радован Караџиќ - доби 40-годишна затворска казна за различни злосторства, вклучувајќи и за масакрот во Сребреница.

Повеќето Срби не се согласуваат со прикажувањето на бројот на жртвите. Покрај тоа, според нив, стореното во Сребреница неможе да се класифицира како геноцид.

Според официјалните резултати, објавени денеска, Младен Грујичиќ освоил 54,4 проценти од гласовите на изборите на 2 октомври во позадина на 45.5 проценти за досегашниот градоначалник - босанскиот муслиман Чамил Дураковиќ.

Кога босанските муслимани почнаа да се враќаат во градот по 2000 година, меѓународната заедница им вети заштита. Сега многу од нив се плашат дека повторно ќе бидат принудени да ги напуштат своите домови, пишува Ројтерс.

Многу од повратниците се возрасни жени, кои сакаат да се поблиску до гробовите на убиените блиски. Досега во масовни гробници во источна Босна биле пронајдени тела на 6.300 лица.