Еден босански пратеник денеска беше уапсен при давање поткуп во хотел во Тузла,  соопшти Обвинителството на БиХ. Станува збор за пратеник во Парламентот на Федерацијата, а давал поткуп од 20.000 конвертабилни марки (околу 10.000 евра). По налог на обвинителот од одделението за организиран и стопански криминал и корупција, судот го стави во притвор. „Пратеникот О.М. е под истрага на Обвинителството и е осомничен за организиран криминал во врска со други кривични дела, меѓу кои и примање поткуп од едно лице поради решавање на работниот статус и вработување“, посочуваат од Обвинителството. Оттаму тврдат дека оваа акција е порака дека надлежните се подготвени да се пресметаат со организираниот криминал и корупцијата во државата. „Во таа борба никој нема да биде поштеден“, се додава уште во соопштението.