Почетната легализација на марихуаната во сојузната држава Колорадо донесе економски бум со огромен промет, високи даноци кон државниот буџет и нови отворени работни места, но сега индустријата е во голема криза поради се потешката и пообемната владина регулација. Кога марихуаната е веќе легална и достапна паѓа и побарувачката, а по секоја пазарна логика паѓа и цената на производот. Друг проблем со легалните произведувачи и продавачи е слабата поддршка од банките со кои не можат да го развијат својот бизнис преку заеми или кредити. Банките се обврзани со федерални закони да водат строга евиденција за бизнисите кои работат со марихуана, да испраќаат редовни извештаи за сомнителни активности и да внимаваат како е потрошен секој долар. Токму затоа голем дел од банките прекинаа соработка со продавниците за марихуана и им нанесоа голем финансиски удар. Сега, експертите предвидуваат дека државата ќе мора да попушти и да внесе реформи со кои ќе дозволи бизнисот да се развива и ефективно да се спроведе законот за легализација на марихуаната.