Со цел да се олеснат услугите за компаниите, во 24 лаборатории во рамките на јавните високообразовни и научни институции, ќе може да се прават анализи и испитувања. Што може да се прави во нив, бизнисмените ќе дознаат до крајот на октомври, кога ќе им бидат презентирани апликациите и истражувањата што тие ги поддржуваат лабораториите. Според министерот за образование и наука Спиро Ристовски, вака ќе им се олесни на бизнисмените кои повеќе нема да бидат приморани да користа тешко достапни анализи кои ги прават во далечни земјите и за многу повисоки цени. Идејата е на овој начин да се спои науката и стопанството. „Во овие 24 лаборатории се инвестирани речиси 500 милиони денари и по своите специфичности тие се меѓу ретките во регионот“, рече Ристовски кои појасни дека во нив може да се работат анализи од повеќе области како градежништво, текстилна индустрија, информатика, телекомуникации, животна и работна средина, земјоделство и безбедност на храна и слично. Овие лаборатории беше појаснето дека се дел од 80-те нови лаборатории за истражувачки дејности за кои се вложени 1,6 милијарди денари со што, рече Ристовски, ова е еден од најголемите проекти на Владата. Од Сојузот на стопанските комори посочија дека проверката на квалитетот на македонските производи ќе ги направи поконкурентни на светските пазари и ќе го зголеми извозот. Се надеваат дека и реално ќе се поттикне соработката на приватниот сектор и истражувачките установи. „ Незначителен број од нашите производствени капацитети можат да си дозволат да поседуваат развојни и истражувачки лаборатории, па на овој начин значително се придонесува кон нивните потреби за подобрување на квалитетот и создавање нови и конкурентни производи. Тие ќе значат и намалување на трошоците, заштеда на време и избегнување на логистиката што е потребна испитувањата да се направат во странство“, рече Митко Алексов од Сојузот на стопанските комори. За претседателот на Стопанската комора на Македонија Бранко Азески, важно сега е самите лаборатории да работат на надградување на кадарот, да ги следат светските трендови и да ги пренесат нивните искуства, рече Азески. Како посебен проблем беше посочена и акредитацијата на лабораториите, а бизнисмените побараа од Владата тие да се акредитираат и во нашиот Институт за акредитација и во други земји, за да бидат признаени македонските сертификати и на странски пазари.