Ирачки бизнисмени идната недела ќе ја посетат Македонија за да се запознаат со нејзините економски потенцијали, пред се во делот на индустриските и прехранбените производи, како и секторите градежништво, туризам, здравство, образование и спорт, информира Стопанската комора на Македонија. „Ирачките компании се заинтересирани за увоз и дистрибуција на разни видови македонски производи на ирачкиот пазар, прехранбени и пијалоци, земјоделски производи, козметички и фармацевтски производи, метален комплекс, градежништво и градежни материјали, индустриска опрема, трговија на производи за широка потрошувачка, мебел, транспорт, туризам,.... Бизнисмените ќе се запознаат и со можностите за инвестирање и со потенцијалите за водење бизнис во Македонија. Во рамки на нивната посета, ќе организираме бизнис-форум за воспоставување билатерални деловни контакти со македонски компании кои би се јавиле како нивни потенцијални деловни партнери“, вели Љубица Нури од Стопанската комора на Македонија.

Делегацијата е дел од Унијата на ирачки бизнисмени со седиште во Багдад, бизнис асоцијација која соработува со арапските и меѓународните организации и ги поттикнува на заеднички вложувања во Ирак со цел реконструкција на економијата на оваа земја.

Идејата на македонските и ирачките бизнисмени, кои веќе имале воспоставено првични контакти, била обнова на силните економски врски меѓу двете земји кои  постоеле пред дваесет години.