Денес, министерот за здравство на Хрватска, Вили Берош, потврди дека Хрватска се распрашува за можноста за интервентен увоз на руска вакцина против ковид пред таа да биде одобрена од ЕМА, Европската агенција за лекови.

„Вчерашниот разговор со рускиот амбасадор во врска со набавката на руската вакцина не е отстапување од заедничката набавка на вакцини од страна на Европската комисија, туку потрага по комплементарни методи што ќе бидат во согласност со прописите на Европската комисија и хрватските. Разговорот започна од рускиот амбасадор и беше пријателски. Разговаравме, како што соопшти руската амбасада, и нагласивме дека ова е можна варијанта, но мора да биде во рамките на европските регулативи и позитивните законски прописи на Република Хрватска, која одлучува кога може вакцината да влезе на хрватскиот пазар“, рече Берош.

Министерот за здравство рече дека хрватското Министерство за надворешни работи испратило писмо до Руската амбасада со барања од ХАЛМЕД (Хрватска агенција за лекови), во кое се бара документ од рускиот производител на вакцини за да се процени безбедноста, ефективноста и квалитетот на вакцината.

„Го замолив рускиот амбасадор да ја забрза испораката на таа документација за да може ХАЛМЕД да донесе одлука“, рече Берош.

Со оглед на тоа што премиерот Пленковиќ претходно изјави дека руската вакцина не може да дојде во Хрватска пред да биде одобрена од ЕМА, новинарите го прашаа Берош дали тоа значи дека Хрватска се свртува кон можноста за набавка на руската вакцина дури и пред одобрувањето од ЕМА, а тој одговори потврдно на тоа прашање.

„Да, опцијата е оваа вакцина да дојде во Хрватска без одобрение од ЕМА, односно со одобрение на ХАЛМЕД, за да се овозможи таканаречен интервентен увоз, да се овозможи увоз на вакцината. Затоа ХАЛМЕД направи список со 11 документи кои рускиот производител на вакцини мора да ги достави.

„Пред тоа може да се процени можноста за увоз на таа вакцина. Пред тоа, мора да се реализираат одредени предуслови, односно испорака и проценка на документацијата врз основа на која ХАЛМЕД ќе процени дали вакцината е безбедна, квалитетна и ефикасна“, рече Берош.

Запрашан од новинарите колку време може да трае проценката на ХАЛМЕД за руската документација откако ќе пристигне, Берош одговори: „Таа анализа ќе потрае некое време, но тука станува збор за денови и недели, а не за месеци“.

Извор и фото: Индекс.хр