Министерот за надворешни работи на Руската Федерација Сергеј Лавров денеска изјави дека не може да одговори на одлуките донесени од Србија и нејзиното раководство во врска со воведувањето санкции кон Руската Федерација и дека Русија длабоко го почитува српскиот народ.

Во интервју на интернет за четири српски медиуми, меѓу кои и Танјуг, Лавров рече дека Србите и Русите се братски народ што ги поврзува заедничката историја, но и победите во борбата против заедничките непријатели.

- Не можам да одговорам на одлуките што ги донесе Србија и нејзиното раководство. Ние сме братски народи, нас нè обединува заедничката историја, заедничките победи против заедничкиот непријател и гледаме колку овие чувства се вкоренети во душата на српскиот народ и неговата историска меморија - рече Лавров, одговарајќи на прашање на Новости.

Тој посочува дека Русија ништо не наметнува со сила и додава дека Западот тоа го прави со економски и други уцени.

-Тоа не е пристојно, не е така да се однесуваме во општеството или на меѓународната сцена кога сите се обидуваат да си ги извалкаат рацете. На таа тема неколку пати зборуваше и претседателот на Србија, Александар Вучиќ, кој рече дека Србија има свои интереси. Длабоко го почитуваме српскиот народ и неговата посветеност на неговите традиции и неговите историски пријатели - рече Лавров.

Тој рече дека преговорите со Украина може да се водат и во Белград и дека освен во Истанбул, каде веќе е договорена средба, се подготвени да разгледаат и други локации за преговори, меѓу кои и Белград.

Лавров во интервју за српските медиуми одговори на прашањето што според него би било совршено место за преговори за ставање крај на оваа војна.

- Белград со својот статус, како град и гледна точка, е целосно погоден за какви било преговори на сите нивоа - рече Лавров.

Тој посочи дека местото на преговори треба да биде прифатливо за двата преговарачки тима.

- Имавме три директни разговори во Белорусија, а потоа имавме пауза, бидејќи поради технички причини не можеше да има директни разговори. Сега е постигнат договор за средба во Истанбул. Тоа ја задржува географската точка каде што се поклопија можностите на двете земји - изјави Лавров.

Ќе повторам дека сме подготвени да погледнеме и на други локации за преговори, вклучително и Белград, рече Лавров.