По завршувањето на преговорите помеѓу партиите,  американскиот амбасадор, Џес Бејли изјави дека денеска имало извесен напредок.

Сепак, конечен договор засега нема.

Бејли и евроамбасадорот Аиво Орав велат дека оставаат простор партиите за време на викендот да размислат за опциите на маса и следната недела преговорите да продолжат.

Бејли во име на САД и ЕУ рече дека е оптимист дека кај партиите има политичка волја за решавање на отворените прашања, се со цел државата да продолжи напред.

Нема информација кое е спорното прашање кое ги „кочи“ преговорите.

Партиските претставници не дадоа изјава за медиумите. Викендот ќе го искористат за консултации, а од понеделник повторно ќе преговараат.

Се преговараше и деновиве со часови, а Брисел вчера апелираше што поскоро да се најде решение и за последното прашање кое не е договорено меѓу партиите. Се споменуваше дека копја се кршат околу ингеренциите на министерот за внатрешни работи.