„Фортенова група“ и „Бадел 1862“ потпишаа договор за ексклузивни преговори за продажба на компаниите од секторот пијалаци на „Фортенова“. Според договорот, хрватската компанија ќе има ексклузивно право да преговара за потенцијално преземање на уделите во „Јамница плус“, „МГ Мивела“, „Сараевски кисељак“ и „Јамница Љубљана“.

Од „Фортенова“ појаснија дека одлуката следува по спроведен конкурентен процес со учество на повеќе заинтересирани страни, но преговорите ќе продолжат само со „Бадел 1862“. Периодот на ексклузивност трае до 30 септември 2026 година, до кога се очекува да завршат разговорите за потенцијалната трансакција.

Сепак, од „Фортенова“ нагласуваат дека не станува збор за финализирана продажба. „Бадел 1862“ е избраниот преговарач, но конечниот договор допрва треба да се постигне.

„Јамница“ е еден од најпознатите регионални производители на минерална вода и безалкохолни пијалаци, со значајно присуство во Хрватска, Србија, Босна и Херцеговина и Словенија преку своите брендови и компании.

Доколку трансакцијата се реализира, таа би претставувала еден од најголемите потези на регионалниот пазар на пијалаци, со оглед на стабилната позиција на брендовите што се дел од групацијата.

Ова не е прва крупна зделка меѓу „Фортенова“ и „Бадел 1862“ – во март 2025 година, хрватската компанија ги презеде „Агролагуна“ и „Винарија Новиград“, зајакнувајќи го своето присуство во сегментот на вина и алкохолни пијалаци.

Со потенцијалното преземање на бизнисот со пијалаци на „Фортенова“, „Бадел 1862“ ќе го прошири својот портфолио во сегментот на минерални води и безалкохолни пијалаци, надополнувајќи ја веќе силната позиција во алкохолните пијалаци и вина.

Пословни.хр