Најновото истражување на консултантската куќа „Мерцер“ се однесува за најскапите градови во светот и во предвид се земени 200 ставки, меѓу кои облеката, транспортот, храната и забавата, билетите за филмови, кафе, бензин, односно сите трошоци на кои се изложени странците од сместување до набавување на неопходни продукти за живот.

Предмет на истражувањето се странците кои се испратени да работат во странски земји на релативно подолг временски период.

Според листата, најскапи градови за живот се азиските и тоа Хонг Конг е најскапиот град за живеење во светот кога станува збор за странци кои работат во други земји, па следат Токио, Цирих и Сингапур, додека Сеул е петти.Четири од петте најскапи градови се од Азија, а во топ 10 листата вклучени се и Луанда, Шангај, главниот град на Чад – Нџемена, Пекинг и Берн.

Во конкуренција од 209 градови во светот,  Скопје е на 197 место на листата на најскапи градови за живот на странски работници, а меѓу другите поголеми европски градови во рангирањето се наоѓаат Франкфурт (68), Берлин (71), Минхен (57), Париз (34), Рим (46), Мадрид (64), Виена (39), Москва (17) Санкт Петербург (49) и Киев (173).