Патната инфраструктура во Македонија долго време беше во втор план. Изминативе десет години не се изгради речиси ниту еден автопат (освен кусата делница Куманово Табановце), а на добар дел од автопатите се возеше по дупки и крпеници (особено Велес - Скопје). Дури лани Владата најави изградба на три автопати, со пари од кинеските кредити. Министерот за транспрот и врски вели дека годинава пред нас во Македонија ќе се градат 600 километри патишта. Во интервју за Eвести.мк Мисајловски потенцира дека ќе се работи на вкупно 24 регионални патишта и 7 автопати чија вкупна должина изнесува околу 600 километри. -Во континуитет ќе продолжи изградбата на трите нови автопати. Демир Капија-Смоквица, Миладиновце – Штип, Кичево –Охрид, а во втората половина на 2016 планираме со отпочнување на изградба на автопатска делница Требениште -Струга. Според зборовите од министерот ќе продолжи со реконструкција на 13 –те регионални патишта. Многу важно е тоа што ќе започнеме со изградба на 5 нови експресни патишта и тоа: Градско – Прилеп во должина од 33,5 км и вкупна проценета вредност од 80,7 милиони евра. Охрид-Пештани во должина од 14,5 км и проценета вредност од 52 милиони евра, Штип-Кочани во должина од 26 км, проценета вредност од 53,4 милиони евра, Штип-Радовиш должина 38 километри, проценета вредност 64 милиони евра и Ранковце- Крива Паланка во должина од 26 км, проценета вредност од 78 милион евра. Исто така во 2016 година ќе започне рехабилитација и на други 6 регионални патишта.