Американската компанија Форд Моторс објави пад на основната квартална добивка од околу 50 проценти, на 1 милијарда долари.

Автомобилскиот производител објави нето загуба во четвртиот квартал од 2025 година од 11,1 милијарди долари по значителните, претходно објавени отписи во своите програми за електрични возила, објави Ројтерс.

Прилагодената заработка по акција на компанијата од 13 центи за кварталот беше пониска од прогнозите на аналитичарите од 19 центи по акција.

Форд, на тој начин, меѓу другото, апсорбираше повисоки од очекуваните трошоци од пожар кај добавувач на алуминиум.

Извршниот директор на компанијата, Џим Фарли, предвиде силни резултати оваа година, бидејќи производителот на автомобили ги намалува трошоците и работи на производство на конкурентни модели на глобалниот пазар.

Акциите на Форд ја затворија редовната трговска сесија на 13,57 долари, што е намалување од 0,15 проценти.

Компанијата проектираше заработка пред камати и даноци од 8 до 10 милијарди долари за 2026 година, во рамките на просечната проценка на аналитичарите на LSEG од 8,78 милијарди долари.

Автомобилскиот производител, исто така, проектираше трошоци од околу 2 милијарди долари оваа година поради царините на американскиот претседател Доналд Трамп.

Голем дел од таа мерка е поврзан со снабдувањето со алуминиум, особено за профитабилните камиони F-150 на Форд.

Тарифите на Трамп, како и катастрофалниот пожар кај добавувач на алуминиум, доведоа до пад на профитот на компанијата минатата година.

Фото: Принтскрин/Икс