Косовската полиција уапсила синоќа неколку граѓани кои во центарот на Приштина, на плоштадот Скендербег палеле српски производи. Приштинската телевизија Т7 која директно го пренесуваше настанот пренесе дека меѓу притворените бил и претседателот на навивачите на фудбалскиот клуб Приштина Аљберт Кастрати. 

И во некои други места на Косово вчера биле палени производи од Србија како реакција на одлуката на косовската влада да ја зголеми таксата за увоз на овие производи од 10 на 100 насто и да ја забрани продажбата на артикли во кои како земја на увоз не е наведено уставното име.

Последиците од одлуката на Приштина да воведе царина од 100 отсто на увозот на стока од Србија и Босна и Херцеговина, ќе бидат видливи кога ќе се испразнат магацините, а со овие мерки посебно се погодени малите продавници, објавија српските медиуми.

Лебот поскапел во повеќе делови на Косово, како и брашното, зејтинот, квасецот, солта, шеќерот. Цената на лебот се зголемила 30 отсто. 

Владата во Приштина соопшти дека е преполовена доставата на стока и дека мерките почнале да даваат резултат, па веројатно резервите бргу ќе бидат потрошени.

Во Приштина синоќа се уапсени лица кои палеле српски производи. Огнот веднаш е изгаснат. 

Косовскиот премиер, Рамуш Харадинај, упати писмо до шефицата на европската дипломатија, Федерика Могерини, во однос на зголемувањето на царините за 100 проценти за стока од централна Србија и Босна и Херцеговина, во кое тој вели дека Приштина е посветена на принципите за слободна трговија и дека бара заемно почитување, вистинска соработка и реципроцитет. Трговската војна почна откако Косово се налути затоа што Србија според нив водела кампања да не влезат во Интерпол. 

Во српските средини во Косово, денеска попладне ќе се одржи мирен едночасовен протест.