Се намалил бројот на дрвокрадците во Македонија, покажаа податоците на ЈП „Македонски шуми“, но од претпријатието повторно апелираат до граѓаните да купуваат огревно дрво од само легална сеча, жигосано и со испратница. „Во спротивно, ако се работи за нелегална, дива сеча, граѓаните само ќе ги фрлат парите во вода. „Македонски шуми“ во соработка со Шумската полиција и МВР е постојано на терен и ги проверува пратките, врши контроли при транспортот на огревно дрво. Годинава дрвокрадството е со намален интензитет. Сепак, останува повикот до граѓаните ако евентуално забележат, да пријават нелегална сеча која го уништува шумскиот фонд и предизвикува ерозија“, рече  помошникот генерален директор Тони Јованов. Цената на огревното дрво сезонава е иста како и лани - 2.450 денари за кубен метар, а до 30 септември цените на буковото огревно дрво се намалени за 10 отсто за сите физичи лица и за 15 проценти за корисниците на социјална помош.