Антикорупциска ќе поднесе барање до претседателот Стево Пендаровски да не го потпише указот на законот кој вчера беше изгласан по скратена постапка во Собранието а со кој преку директна спогодба ќе му биде овозможено на американско-турскиот конзорциум „Бехтел и Енка“ да ги гради автопатите по коридор 8 и оној помеѓу Прилеп и Битола.

Од Државната комисија за спречување на корупција најавуваат дека следниот чекор ќе биде оспорување пред Уставен суд. Претседателката на ДКСК, Билјана Ивановска, по извршена антикорупциска проверка рече дека овој закон е високоризичен и има судир на интереси.

„Нема јавен интерес каде има вакви политички мудрости, сплеткарења. Во функција на јавниот интерес треба отворено, транспарентно да се излезе пред народот и да се каже зошто и како се поставни работите, а не вака од скратена поскратена постапка да се донесува закон во Собрание што е од многу важно значење за целата држава“, истакна денеска Ивановска на седницата на комисијата.