Кочо Анѓушев, вицепремиерот за економски прашања, можноста за влез на „Фолксваген“ во Македонија како странски инвеститор ја прогласи за шпекулација и рече дека „Гересхајмер“ е всушност големата компанија која влегува во индустриските зони во Македонија.

„Не, нема ништо од тоа дека Фолксваген ќе инвестира во Македонија и тие информации се шпекулација“, рече кусо Анѓушев на прашање на Дојче Веле.

За „Гересхајмер“, една од најголемите германски компании која произведува стаклени и пластични пакувања за фармацевтската и козметичката индустрија, вели дека вработува исклучително високо квалификувани и квалитетни луѓе-инженери. 

- Многу е важно што овие 18 компании кои ги донесовме како директни странски инвестиции веќе не се дел од трудоинтензивната дејност, туку повеќе се работни места за инженери, висококвалификуван кадар и се надеваме дека ќе имаат поголеми плати и ќе носат додадена вредност во економијата, додаде Анѓушев.

Додаде дека без разлика дали Владата ќе донесе закон за повисока минимална плата, што веројатно и ќе го направи, платите ќе растат како резултат на реалната состојба на пазарот.