Американската корпорација „Амфенол“ ќе гради фабрика во Кочани. Компанијата за производство на автомобилски делови ќе инвестира шест милиони евра во првата фаза и ќе вработи 1.500 лица во првите пет години од функционирањето на фабриката, најави премиерот Никола Груевски. Тој денеска се сретна со потпретседателот на американската корпорација „Амфенол“ и генерален директор на автомобилската групација при корпорацијата Џон Тренор. „Одлуката за инвестирање во Македонија е донесена врз основа на големиот број можности што ги нуди земјава, добрата квалификувана работна сила, поддршката од Агенцијата за странски инвестиции и другите надлежни институции, но најмногу врз основа на поголемата бизнис клима“, нагласи Тренор. Од предвидените 1.500 вработувања, годинава ќе се вработат околу 250 до 350 лица.