Албанија ги отвори своите граници за туристи без никакви услови поради пандемијата на корона вирусот. Во соопштението на албанското Министерството за надворешни работи се прецизира дека негативен тест за Ковид-19, или какви било посебни документи, нема да бидат потребни за влез во Албанија.

Исто така се наведува дека границите на Албанија ќе бидат отворени за сите албански и странски државјани за време на туристичката сезона.

Од 1 јуни веќе не е задолжително да се носат маски на отворено, но се задолжителни во затворени простории и на места каде што не е можно да се одржува социјална дистанца.

Времето на полициски час е скратено и сега трае од 23 до 6 часот наутро.

Одлучено е и дека од 15 јуни ќе биде дозволено собирање до 15 наместо до 10 лица, а од 1 јули се планира уште повеќе да се скрати полицискиот час, односно да биде од 24 до 6 наутро, а ќе бидат дозволени сите спортски и културни настани за јавноста со капацитет до 30 проценти.