Словенечкиот авиопревозник „Адриа ервејс“ веднаш по Велигденските празници нема повеќе да нуди бесплатен оброк и пијалоци  на повеќето свои летови во економска класа. Услугите ќе останат само во бизнис класа и на изнајмените чартер-летови. Преку новата услуга Скајшоп, патниците на Адриа ќе можат да купуваат храна по сопствен избор и пијалоци во авионите. На овој начин словенечкиот национален авиопревозник се обидува да воспостави модел кој е комбинација на класична авиокомпанија и нискобуџетен превозник, најави директорот за маркетинг на „Адриа ервејс“ Изток Франко. Истовремено, на овој начин „Адриа“ се обидува да се избори и со се посилната конкуренција од нискотарифните авиокомпании. „Поради трендовите што ги диктираат нискобуџетските компании, се менуваат и очекувањата на патниците и на нивните одлуки битно влијаат фактори како цената, возниот ред и безбедноста, додека останатите услуги како багаж, храна, резервација на седиште доаѓаат во втор план“,вели Франко. Словенечката авиокомпанија во првите три месеци оваа година го зголемила бројот на превезени патници за 10%, додека просечната цена на билетот е намалена за околу 5%. „Адриа ервејс“ лета и на релацијата Скопје-Љубљана, која претставува важна конекција за многу европски дестинации за патниците од Скопје.