Ад хок телото за мониторинг на медиумите по долги дебати се согласи за одредбите од новиот деловник за работа по кој ќе работат и носат одлуки за изрекување на опомени или казни за медиумите. Главниот проблем беше како ќе се гласа меѓу петте члена, по двајца предложени од власта и опозицијата и еден независен член. Решено е да се гласа со мнозинство од три гласа, со тоа што за одржување на седница потребен е кворум од тројца, но за тие да одлучат треба да постигнат консензус. Првиот извештај за период од изминатите 10 дена е веќе изготвен. Остануваат уште девет периоди до денот на изборите. Тој се уште не е доставен до членовите на ад хок телото. Дел од нив вчера изјавија дека медиумите главно ги почитувале професионалните стандарди.