Турската странска помош за вкупно 121 држава во 2012 година била во износ од 3 милијарди 436 милиони долари, објави турскиот сајт „Ворлд булитин“, повикувајќи се на извештај на Турската агенција за меѓународна соработка и развој.

Турскиот вицепремиер Бекир Боздаг изјави дека Турција повеќе не е земја примател, туку земја што дава помош, благодарение на политичкиот и економски успех за време на владеењето на Партијата на правдата и развојот.

Во извештајот се наведува дека за првпат помошта за странски држави надминува двe милијарди долари.

Главна причина за зголемувањето е обезбедената помош за неколку окрузи со сириски бегалци и заемите, дадени на земји во развој.

Земји од Блискиот Исток примиле 46,6 отсто од средствата, 31 отсто од помошта биле наменети за земји од Африка, 18 проценти за Јужна и Централна Азија, а 3 проценти за земји од Балканот и Источна Европа.