Оранжерии „Хамзали“ на домашниот пазар пласира оранжериски продукти во вредност од 3,77 милиони евра, а извозот го зголемил за 6 пати до износ од 129.000 евра. Компанијата на Васе Митев, кој воедно е газда и на Зомимак, голема струмичка фирма за трговија на големо со овошје и зеленчук, книжи солидна добивка и покажува дека за тој што знае како треба храната е на цена

Храната е на цена! Производителот на раноградинарски производи на струмичката компанија„Оранжерии Хамзали“ на македонскиот пазар пласираше домати, краставици, пиперки и други продукти во вредност од 3,77 милиони евра, покажуваат официјалните податоци на оваа струмичка компанија за првите шест месеци годинава.

Билансот на успех на ова друштво, во кое доминантен сопственик е бизнисменот Васе Митев, покажува дека продажбата на компанијата во споредба со истиот период лани е зголемена за 4 отсто и изнесува 3,9 милиони евра. Учеството на домашната продажба е повеќе од доминантно, а извозот учествува со 129.000 евра и во споредба со истиот период лани е зголемен за 6 пати.

Вредноста на залихите на крајот на јуни годинава во споредба со истиот период лани е зголемена за 4 пати и изнесува 1,32 милиони евра. Вкупните оперативни расходи на друштвото за првото полугодие достигнаа 3,2 милиони евра и убедливо најголема расходна ставка се останатите расходи на кои отпаѓаат 1,27 милиони евра од сите трошоци. Компанијата нема финансиски приходи ниту финансиски расходи, а нето добивката на половина година е 1,5 милиони евра резултат што во споредба со лани е подобар за 4отсто.

Вкупните обврски на друштвото со состојба на 30 јуни надминуваат 11 милиони евра од кои 3 милиони евра се обврски за краткорочни кредити. Долгорочните кредитни обврски на друштвото изнесуваат 3,29 милиони евра.

Акцијата на оваа компанија е речиси воопшто неликвидна. Последната трансакција е реализирана на 14 февруари 2019 година, а единствената постигната цена е 100 денари за акција. Книговодствената цена на акцијата е 782 денари. Васе Митев поседува 88 отсто од акциите на друштвото.