На 26 април во Врховниот суд во Атина повторно седнуваат поранешниот началник во УБК Горан Грујевски и неговиот колега Никола Бошковски. Денеска рочиштето беше прекинато и не се одлучи за нивната  екстрадиција.

Рочиштето беше прекинато поради правни прашања, а Врховниот суд требаше  да одлучува по жалбата на одлуката на Солунскиот суд кој пресуди  Грујевски и неговиот колега Бошковски да бидат екстрадирани во Македонија за да им се суди за предметот од СЈО „Тврдина“ и „Таргет“

По барање на адвокатите, рочиштето за жалбата по одлуката на Судот во Солун за екстрадиција на Грујевски и Бошковски, во Врховниот суд во Атина се одржуваше зад затворени врати, а така ќе биде и на наредното рочиште.

Тимот од двајцата грчки адвокати на Грујевски и Бошковски побара од шест члениот Совет на судии и обвинителот рочиштето да не биде јавано, а по барањето на претседателката на Советот, тие образложија зошто сакаат судницата да биде испразнета и искористија неколку аргументи, јави дописникот на МИА од Атина.

Тие истакнаа дека во судницата има и новинари, а нивните клиенти се обвинети за политички криминал и во исказот што треба да го дадат ќе има и доверливи елементи кои не се за јавноста.

Безбедноста на неговите клиенти беше уште еден од аргументите на адвокатите , бидејќи како што рекоа не се знае кој се’ се наоѓа во судницата.
Поранешните функционери во УБК, Горан Грујевски и Никола Бошковски, се  обвинети од СЈО за предметот „Тврдина“  и „Таргет“,  за незаконско прислушување на илјадници граѓани преку злоупотреба на системите за следење во МВР и за физичко уништување на дел од таа опрема. Тие беа  три месеци во бегство и фатени на аеродромот во Солун  со фалсификувани бугарски пасоши од каде што планирале да побегнат.