Народниот правобранител Насер Зибери се пожали на финансиската независност која ја предвидува буџетот на институцијата. Омбудсманот често не ја добива согласноста за одредени трошоци од Министерството за финансии и на крајот, како што вели, над 30 отсто од предвидените средства останувале непотрошени.

- Јас разбирам ние со Владата да водиме преговори за утврдување на рамката, но искористувањето на тие средства не може да се подведе под постојан надзор и препреки од Министерството за финансии. Често пати на крајот 30 отсто од средствата ние не може да ги искористиме и ни се враќаат повторно во буџетот, а при тоа имаме елементарни потреби со кои инаку не можеме да се справиме, рече Зибери во емисијата „Утрински брифинг“.

Народниот правобранител претпоставува дека тоа е политика на Владата која министерот за финансии ја спроведува, а од друга страна, вели Зибери, дека неговата институција законски располага самостојно со буџетската рамка.

- Јас веќе разговарав со новиот премиер и доколку повторно не наидам на разбирање, јас ќе мора да се обратам до меѓународните институции кои се многу чувствителни кога станува збор за овие тела, додаде Зибери.